कैलाली । भारतको उत्तराखण्ड प्रदेशमा हुन गइरहेको पञ्चायत निर्वाचनलाई लक्षित गरी बैतडीस्थित नेपाल–भारत जोड्ने सीमानाका शुक्रबार साँझ ७ बजेदेखि बन्द हुने भएको छ ।
जिल्ला प्रशासन कार्यालय बैतडीका अनुसार झुलाघाट नाकासहित तल्लोसोराड क्षेत्रमा सञ्चालनमा रहेका घाटहरू साउन १२ गते मतदान प्रक्रिया नसकिँदासम्मका लागि बन्द रहनेछन् । सहायक प्रमुख जिल्ला अधिकारी वेदनिधि खनालले भारतीय पक्षको अनुरोधमा सीमानाका बन्द गर्न लागिएको जानकारी दिए ।
भारतको पिथौरागढमा हालै सम्पन्न सीमा सुरक्षा समन्वय बैठकमा भएको सहमतिअनुसार नै नाका बन्द गर्ने निर्णय गरिएको हो । भारतको उत्तराखण्ड प्रदेशमा यही जुलाई २४ र २८ (साउन ८ र १२ गते) पञ्चायत निर्वाचन हुँदै छ ।
यही निर्वाचनको सुरक्षालाई ध्यानमा राख्दै बैतडीको झुलाघाट नाका साउन ९ गतेदेखि १२ गतेसम्म बन्द रहनेछ । दार्चुलाको पुलघाट नाका भने जुलाई २१ (साउन ५ गते) बेलुकादेखि जुलाई २४ (साउन ८ गते) बिहानसम्म बन्द गरिएको थियो ।
