काठमाडौँ । इजरायली सेनाले लेबनानका थुप्रै स्थानहरूमा हवाई आक्रमण गरेको छ। स्थानीय सञ्चारमाध्यम र सामाजिक सञ्जालमा फैलिएका भिडियोहरूका अनुसार आक्रमणहरू लेबनानका पूर्वी, दक्षिणी र पहाडी क्षेत्रहरूमा केन्द्रित रहेको अलजजीराले जनाएको छ ।
लेबनानको सरकारी समाचार एजेन्सी नेशनल न्यूज एजेन्सी का अनुसार इजरायली युद्धक विमानहरूले पूर्वी लेबनानको बोडाई सहर नजिक कम्तीमा तीन पटक बमबारी गरेका छन्।
त्यसैगरी, दक्षिणी लेबनानको टायर सहर नजिकको अर्जी र बुर्ज रहाल क्षेत्रका छेउमा पनि तीनवटा आक्रमण भएको जनाइएको छ। सिदोन नजिकको कफर मेल्की क्षेत्र, लिटानी नदी किनारका दुई शहर र इक्लिम अल-टुफाहको पहाडी क्षेत्रमा समेत बमबारी गरिएको छ।
