ह्युस्टन । संयुक्त राज्य अमेरिकाविरुद्ध उत्कृष्ट पुनरागमन गर्दै मेक्सिकोले गोल्ड कपको उपाधि रक्षा गरेको छ। आइतबार भएको खेलमा मेक्सिको २-१ गोलले विजयी भएको हो ।
क्रिस्टल प्यालेसका डिफेन्डर क्रिस रिचर्ड्सको गोलको मद्दतले टोटनह्याम र चेल्सीका पूर्वप्रशिक्षक मौरिसियो पोचेटिनोको टोलीले खेलको चौथो मिनेटमा अग्रता लिएको थियो। सेबास्टियन बेरहाल्टरको फ्री-किकमा उनले हेडमार्फत गोल गरेका थिए ।
तर, अमेरिकाको अग्रता २३ मिनेट मात्र टिक्न सक्यो। फुल्ह्यामका स्ट्राइकर राउल जिमेनेजले मार्सेल रुइजको चलाखपूर्ण रिभर्स पासमा आठ यार्ड टाढाबाट पहिलो टचमा सट प्रहार गर्दै जाली चुमाए।
जिमेनेजले गोलको खुसियाली मनाउँदै मैदानमा ‘डियोगो जे २०’ लेखिएको जर्सी राखेर बसेका थिए। यो उनको पूर्व वुल्भ्सका सहकर्मी डियोगो जोटालाई श्रद्धाञ्जली थियो । जोटाको बिहीबार २८ वर्षको उमेरमा कार दुर्घटनामा निधन भएको थियो।
मेक्सिकोले दोस्रो हाफमा पूर्ण रूपमा पकड जमायो । ७७ औँ मिनेटमा एडसन अल्भारेजको डाइभिङ हेडर गोलबाट विजयी गर्यो । सुरुमा यसलाई अफसाइड दिइएको भए पनि भिडियो सहायक रेफ्रीले वेस्ट ह्यामका डिफेन्डर अनसाइड रहेको देखाएपछि गोललाई मान्यता दिइयो।
गोल्ड कपमा १६ राष्ट्रहरूले प्रतिस्पर्धा गरेका थिए, जसमा उत्तर र मध्य अमेरिकाका १५ तथा आमन्त्रित टोली साउदी अरेबिया समावेश थिए। एउटा खेल क्यानाडाको भ्याङ्कुभरमा बाहेक सबै खेल संयुक्त राज्य अमेरिकामा आयोजना भएका थिए।
पोचेटिनोले सन् २०१९ मा टोटनह्यामलाई च्याम्पियन्स लिगको फाइनलमा पुर्याएका थिए। उनी चेल्सीबाट बर्खास्त भएको चार महिनापछि सेप्टेम्बर २०२४ मा अमेरिकी राष्ट्रिय टोलीको प्रशिक्षक नियुक्त भएका थिए।
