गुल्मी — गुल्मीमा कालीगण्डकी करिडोर र डहरे खोलामा यातायात अवरुद्ध भएको छ। बिहीबार अवरुद्ध उक्त सडकखण्ड साँझ खुले पनि रातभरको वर्षाका कारण शुक्रबार बिहानदेखि पुनः अवरुद्ध भएको हो।
कालीगण्डकी करिडोरको कालीगण्डकी गाउँपालिका–२ राक्सेमा माथिबाट खसेको पहिरो र सत्यवती गाउँपालिका–६ डहरे खोलामा पानीको बहाव बढेपछि सडक अवरुद्ध भएको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक गंगाबहादुर सारुले जानकारी दिए।
कालीगण्डकी करिडोर सडक अवरुद्ध हुँदा स्थानीय तथा करिडोर हुँदै हिँड्ने यात्रुले सास्ती खेपेका छन्। कालीगण्डकी करिडोरको गुल्मी खण्डमा गरगरे, राक्से, मुल्क र कनौटामा पटक–पटक सडक अवरुद्ध हुने गरेको छ। कालीगण्डकी गाउँपालिकाका वडा नम्बर १, २ र ३ मा करिडोरको गुल्मी खण्ड पटक–पटक अवरुद्ध हुँदै आएको छ।
डहरे खोला रिडी–वामी सडकखण्ड पर्छ। यो बुटवल–बुर्तिवाङ सडकखण्डको रुद्रवेणी–वामी खण्ड हो। डहरे खोलामा पानी पर्नासाथ खोला कालो लेदो माटोसहित आउँदा बाटो नै हराउने गर्छ। यस पटकको वर्षायाममा पटक–पटक डहरे खोलामा सडक अवरुद्ध भइरहेको छ।
जसका कारण यो सडक भएर हिँड्ने सार्वजनिक तथा निजी सवारीसाधनका यात्रुलाई सास्ती हुँदै आएको छ। हाल सडक खुलाउने प्रयास भइरहेको जिल्ला प्रहरी कार्यालय गुल्मीका प्रमुख प्रहरी उपरीक्षक नारायणप्रसाद अधिकारीले जानकारी दिए।
