केशव खड्का, जापान -गुल्मी मुसिकोट नगरपालिका वडा नं ८ मा जन्मे का लोक तथा दोहोरी गायक कमल बरालले मौलिक सोरठी गीत “हाँस न खेलन आयो राजै” बजारमा ल्याएका छन्। नेपाली लोकसङ्गीतमा मौलिकता र परम्परागत स्वरलाई जोगाउँदै आएका बरालको यो नयाँ सिर्जना शुक्रबार (असोज ३१ गते) देखि कमल बराल अफिसियल युट्युब च्यानलमार्फत सार्वजनिक गरिएको हो।
गुल्मीको वामी मैदान क्षेत्रका परापूर्वकालदेखि गाइँदै आएका सोरठी भाकाका परम्परागत शैलीबाट प्रेरित यस गीतमा गाउँको संस्कृति, भाकाको मिठास र प्रेमिल भावनाको मिश्रण गरिएको छ। गीतमा पुराना गुरु गायकहरू मुक्त परियार, कर्णबहादुर विश्वकर्मा, रामबहादुर केसी, अमृत केसी लगायतलाई स्मरण गर्दै उनीहरूले बनाएको परम्परालाई निरन्तरता दिइएको छ।
गीतमा गायक कमल बरालसँगै सहगायकका रूपमा रमेश विश्वकर्मा, सुक्र विश्वकर्मा, प्रेमा राना र रुपी सिंजाली मगरले साथ दिएका छन्। शब्द र संगीत संकलन स्वयं कमल बरालकै रहेको छ भने संगीत समायोजन बीबी अनुरागीले गरेका छन्। मादलमा पोषण घर्ती मगर, सारङ्गीमा कमल बिक र बासुरीमा रत्न बिकको योगदान रहेको छ।
गीतको निर्देशन बिष्णु भट्टराईले गरेका छन् भने कर्णबहादुर विश्वकर्मा, समुन्द्र रसाइली, लक्ष्मी पुन, कृष्ण रसाइली, संजय विश्वकर्मा र नंदिता थापा मगरले नृत्य अभिनयमार्फत भिडियोलाई आकर्षक बनाएका छन्।
मौलिक सोरठीको माध्यमबाट गाउँघरको संस्कृति र परम्परा जोगाउने उद्देश्यसहित सार्वजनिक गरिएको यस गीतले नेपाली लोकसङ्गीतमा नयाँ ऊर्जा भर्ने अपेक्षा गरिएको छ। गायक कमल बराललाई यस नयाँ सिर्जनाको लागि उच्च सांगीतिक सफलताको शुभकामना।
भिडियो
