गुल्मी —गुल्मीमा एक जना पुरुष मृत फेला परेका छन् । जिल्लाको मुसिकोट नगरपालिका-१ पैंदीअमराईको बगाहाका ४७ वर्षीय बोमबहादुर खत्री मृत फेला परेको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक गंगाबहादुर सारुले जानकारी दिए ।
मृत फेला परेका खत्री गत कात्तिक २८ गतेदेखि सम्पर्कविहीन थिए । घरमा एक्लै बस्दै आएका उनी शुक्रबार दिउँसो साढे ३ बजे मात्रै नजिकैको भीरमा मृत अवस्थामा फेला परेका हुन् ।
अप्ठ्यारो भीरमा भएको कारण शव सशस्त्र प्रहरीसँग समन्वय गरेर शनिबार मात्रै निकालिने प्रहरी नायब उपरीक्षक सारुले बताए । साँझसम्म प्रयास गरिए पनि शुक्रबार शव निकाल्न नसकिएको प्रहरीले जनाएको छ ।
एकातिर वडिगाड खोला तरेर जान नसकिने र अर्कोतिर अप्ठ्यारो भीर भएकोले शव निकालेर पोस्टमार्टमका लागि पठाउन नसकिएको हो । घरमा एक्लै रहेका उनी प्रायः बेवारिसे अवस्थामा हिँड्ने गरेको प्रहरीले जनाएको छ ।
