सुर्खेत। शुक्रबारदेखि परेको अविरल वर्षाका कारण पहिरो खस्न गई अवरुद्ध कर्णाली राजमार्ग अझै सुचारु हुन सकेको छैन। ठुलो पहिरो पन्छाउन बाँकी रहेकाले शनिबार उक्त काम सम्पन्न बाँकी रहेको हो ।
कर्णाली राजमार्गको कालिकोट सडक खण्डका तीन ठाउँ र दैलेखको दही खोला भन्दा केही माथितिर ठुलो पहिरो गएर सडक अवरुद्ध भएको थियो । प्रदेश ट्राफिक कार्यालयका प्रमुख रामप्रकाश साहका अनुसार कालिकोटको हुल्मको बाहेक दुई ठाउँको पहिरो पन्छाउने काम सकिएको छ। यद्यपि हुल्मको पहिरो पन्छाउन काम अझै बाँकी रहेको छ । यस्तै दहिखोलातर्फको पहिरो पनि हटाउने काम बाँकी छ।
त्यहाँ दिउँसो देखिनै हटाउने काम सुरु भएपनि वर्षाका कारण र पहिरो ठुलो भएकाले ढिलाइ भएको हो । ‘आज सकिएन अब भोली बिहानदेखि काम हुन्छ,’ उनले भने। पहिरो पन्छाउन बाँकी रहेकाले सुर्खेतदेखि माथिल्लो कर्णाली र माथिल्लो कर्णालीदेखि सुर्खेत आउने सवारी साधनहरू बिच बाटोमा रोकिएका छन्।
