बुटवल : चाडपर्वको बेला घर तोडफोड गरेर सुनका गरगहना र नगद चोर्ने क्रम बुटवलमा तीव्र बन्दै गएको छ। भाइटीकाको दिन राति बुटवल उपमहानगरपालिका–११ नहरपुर निवासी मन्जना थापाको घर फोडेर साढे ६ तोला सुन चोरी भएको छ। घरपरिवारले शुक्रबार मात्र घरमा चोरी भएको थाहा पाएका छन्।
घरको दोस्रो फ्लाइटमा दराजमा राखेको सुनको छड्के तिलहरी, औठी, बाला र चन्द्रमालाका गहना चोरी भएको पीडित थापाले बताइन्। उनीहरू तिहार मनाउनका लागि जन्मगाउँ प्युठानको ऐरावती गाउँपालिकास्थित सराङबेसीमा गएका थिए। घरमा कोही नभएको मौका छोपेर चोरले तोडफोड गरेको पीडितले बताएका छन्।
घरभित्र राखिएका ६/६ वटा काशका थाल र कचौरी समेत लगेको थापाले बताइन्। मुख्य गेटसहित प्रत्येक तलाको कोठा चोरले फोडेका छन्। चोरीका घटनाहरू दिनहुँ भएपनि चोरको अझै पहिचान हुन नसक्दा नहरपुर क्षेत्रका बासिन्दाहरू त्रसित बन्दै गएका छन्।
