अन्तिम समयमा अग्रता जोगाउन नसक्दा नेपालले यमनसँग अंक बाँड्यो



नागरिक अपडेट


काठमाडौँ । इन्जुरी समयमा गोल खाएपछि नेपाल यमनसँग बराबरी खेल्न बाध्य भएको छ । फिफा विश्वकप फुटबल २०२६ छनोट खेलमा मंगलबार राति भएको खेल २–२ को बराबरीमा सकिएको हो ।

साउदी अरबमा खेलिएको खेलमा नेपाल सुरुवातमा नै पछि परेको थियो । नवौँ मिनेटमा पेनाल्टीमार्फत नासेर अल–घवासीले यमनलाई अग्रता दिलाएका थिए । तर, २२ औँ मिनेटमा सञ्जिव विष्टले नेपालका लागि बराबरी गोल फर्काए ।

दोस्रो हाफको ६६ औँ मिनेटमा गिलेस्पी जंग कार्कीले नेपालाई अग्रता दिलाए । तर, ९१ औँ मिनेटमा मोहम्मद अल दाहीले गोल फर्काएपछि नेपाल बराबरी खेल्न बाध्य बन्यो ।

यता नेपाली टोलीका कप्तान किरन चेम्जोङले नेपाली राष्ट्रिय टोलीका लागि १ सयौँ खेल पूरा गरेका छन् । उनलाई खेलअघि १ सय नम्बर लेखिएको जर्सी प्रदान गरिएको थियो ।

नेपालले यसअघिका पाँचवटै खेलमा हार भोगेको छ । आजको खेल अघिसम्म पाँचै खेलमा नेपाली टोलीले एक गोल पनि गर्न सकेको थिएन भने १८ गोल खाएको थियो ।

नेपाली टोली यसअघि दुई खेलमा यूएईसँग क्रमशः ४–० गोल र ४–० गोलले पराजित भएको थियो । नेपाली टोलीलाई यमनले पहिलो खेलमा २–० गोलले हराएको थियो । यमनविरुद्धको दोस्रो खेल मंगलबार राति खेल्न लागिएको हो । नेपालले बहराइनसँग भने दुई खेलमा क्रमशः ५–० गोल र ३–० गोलको हार भोगेको थियो ।

तपाईलाई यो खबर कस्तो लाग्यो ?


तपाईंको प्रतिक्रिया