गुल्मी। गुल्मीको लामकाने सामुदायिक वनमा एक पुरुष मृत अवस्थामा फेला परेका छन्। जिल्लाको धुर्कोट गाउँपालिका–६ रजस्थल किटनीका ५६ वर्षीय शिवबहादुर घर्ति मृत अवस्थामा फेला परेको जिल्ला प्रहरी कार्यालय गुल्मीका प्रहरी नायब उपरीक्षक (डीएसपी) गङ्गाबहादुर सारुले जानकारी दिए।
भदौ १५ गते बिहान करिब १० बजेतिर मदाने गाउँपालिका–७ करङकारुखस्थित लामकाने सामुदायिक वनमा ढलेको सल्लाको हाँगामा पासो लगाइ झुण्डिएको अवस्थामा उनको शव फेला परेको डीएसपी सारुले बताए।
घर्ति झुण्डिएको अवस्थामा भेटिएपछि स्थानीयले प्रहरीलाई खबर गरेका थिए। वनमा मृत भेटिएका घर्ति भदौ ८ गतेदेखि घरबाट सम्पर्कविहीन रहेका थिए। एक हप्तासम्म सम्पर्कविहीन भएपछि परिवार,आफन्त र प्रहरीले निरन्तर खोजतलासी गरेका थिए।
घटनास्थलमा जिल्ला प्रहरी कार्यालय गुल्मीका प्रहरी निरीक्षक भुपेन्द्र थापा नेतृत्वको टोली र इलाका प्रहरी कार्यालय पुर्कोटदहका प्रहरी निरीक्षक विष्णुबहादुर गाहा नेतृत्वको टोली खटिएको छ। हाल घटनाबारे थप अनुसन्धान भइरहेको प्रहरीले जनाएको छ।
