गुल्मी — अलपत्र चिदीचौर खेल मैदानको निर्माण कार्य पुन: सुरु भएको छ । निर्माण व्यवसायीको लापरबाहीले काम रोकिँदा खेलमैदान अलपत्र परेको थियो ।
फुटबल, क्रिकेट र भलिबलले गुञ्जायमान हुने चिदीचौर खेलमैदानको काम बीचमै रोकिएपछि मैदान कुरुप बनेको छ । जेठ/असारसम्म मैदान पानीको ताल बनेको थियो । बालबालिका डुबेर ज्यान गुमाउने डरले मैदानमा अस्थायी नाली बनाएर पानी बगाउने काम भएको थियो ।
रेसुंगा नगरपालिकाले चिदीचौर खेलमैदानलाई दूबो रोपेर व्यवस्थित बनाउनका लागि बहुवर्षीय ठेक्काका रूपमा लुम्बिनी प्रदेश सरकारबाट बजेट सुनिश्चत गरेको थियो । खेल मैदानकै बीचमा पानीको मूल फुट्ने समस्याका कारण उक्त पानीलाई जमिनमुनि नै व्यवस्थित गर्ने र त्यसपछि मलिलो माटोले समथर बनाएपछि दूबो रोप्ने योजना हालको ठेक्कामा छ ।
लुम्बिनी प्रदेश सरकारको सामाजिक विकास डिभिजन कार्यालय पाल्पामार्फत चिदीचौर खेलमैदान व्यवस्थित गर्नका लागि एक करोड रुपैयाँ लागतमा गत वैशाख अन्तिम साता रामेछाप कन्ट्रक्सन काठमाडौंले निर्माणको जिम्मा पाएको थियो ।
२०८३ असारसम्म निर्माण सम्पन्न गर्नुपर्ने म्याद रहेकामा उनले समयभित्र काम सम्पन्न गर्नेमा आश्वस्त रहेको सामाजिक विकास डिभिजन कार्यालय पाल्पाका इन्जिनियर अञ्जली थापाले बताएकी थिइन् । निर्माण कम्पनी रामेछाप कन्ट्रक्सन काठमाडौंका संचालक लीलाबहादुर बस्नेतले विभिन्न बहाना देखाउँदै काम रोकेका थिए ।
रेसुंगा नगरपालिकाका प्रमुख खिलध्वज पन्थीले पटक-पटकको पहलपछि चिदीचौर खेल मैदान सौन्दर्यीकरणको काम अगाडि बढेकाे बताए । ‘बीचमा निर्माण व्यवसायीले सास्ती दिँदा काम रोकिएको थियो,’ उनले भने, ‘पटक-पटक ताकेता गर्दा पनि काम भएन।
हामीले काठमाडौंनै पुगेर पनि आग्रह गर्यौं, धेरै मिहिनेतपछि केही दिनदेखि काम सुरु भएको छ ।’ उनले केही समस्या भए सहजीकरण गर्ने तर जिम्मा लिएपछि काम अलपत्र पार्न नपाइने पनि बताए । ‘अहिले काम सुरु भएको छ,’ उनले भने, ‘अब काम समयमै सकिनेमा आश्वस्त छौं ।’
