गुल्मी । खुकुरी म्युजिक व्याण्डबाट उदाएको खुकुरी युवा क्लवले गीतसंगीतकै क्षेत्रमा नविन कामको अभियान थालेको छ । सामाजिक काममा उदाहरणीय काम गर्दै आफुलाई समुदायमा स्थापित गरिरहेको खुकुरी युवा क्लब रेसुङ्गा नगरपालिका ८ ले तिहारमा खेलेको देउँसीभैलोको रकमबाट सिद्धबाबा माविमा अक्षयकोष स्थापना गरेका छन् ।
यो कोष सिद्धबाबा माविले बिद्यालयमा हुने हरेक सांगीतिक कार्यक्रममा नयाँ प्रतिभाहरुको पहिचानका लागि खर्च गर्नेछ । आफुहरु पनि म्युजिक व्याण्डबाट स्थापित भएकाले गीतसंगीतमा केही नयाँ गर्ने उदेश्यले स्थानीय प्रतिभा पहिचानका निम्ती सिद्धबाबा माविमा अक्षयकोष स्थापना गरेको क्लव अध्यक्ष निशान टण्डनले जानकारी दिए। खुकुरी युवा क्लब स्थापना भएका तीन बर्ष भएमा थुप्रै नविनतम कामहरु भएका छन् ।
टण्डनले क्लवको म्युजिक व्याण्ड मार्फत सांगतिक कार्यक्रम गर्दै आएपनि कैयन प्रतिभाहरु आर्थिक समस्याको कारण परदेश पसेकाले निरन्तता दिन नसकेकाले बिद्यालय मार्फत दिर्घकालिन काम गर्न खोजेको बताए । क्लबले २५ हजार रुपियाँबाट अहिले अक्षयकोष सुरु गरेको छ । बर्सेनी अक्षयकोषमा रकम थप गर्दै लैजाने क्लबको योजना रहेको छ ।
क्लबले जिल्लास्तरीय क्रिकेट प्रतियोगिता, देउँसीभैलो, फागु उत्सब, सरसफार्इ लगायतका सामाजिक काम गर्दै आएको छ । सिद्धबाबा माविका प्रध्यानाध्यापक डोर बिक्रम श्रीसले तिहारमा साथीहरू मिलेर खेलेको देउँसीभैलोबाट सङ्कलित रकम विद्यालय र विद्यार्थीको हितमा खर्च गर्ने क्लबको पबित्र उदेश्यको प्रसंशा गर्नुभयो । रकम जति भएपनी सोच उत्कृष्ट रहेकाले यो सामाजिक कार्य अरुको लागि पनि प्रेरणा बन्ने श्रीसले बताउनुभयो ।
क्लबका सल्लाहकार नारायण आचार्यले खुकुरी ब्याण्डले सचिन बिश्वकर्मा जस्ता प्रतिभा जन्माएकोले अक्षयकोष गीतसंगीतमा भविस्य खोज्नेहरुको लागि उपर्युक्त माध्यम बनेको बताउनु भयो । क्लवकै सल्लाहकार इश्वर विश्वकर्र्मा बिद्यालय र क्लव दुवै सामाजिक संस्था सांगीतिक कार्यक्रमलाई अझै रचनात्मक गराउन क्लवले गरेको आर्थिक सहयोग फलदायी हुने बताउनुभयो ।
रेसुङ्गा नगरपालिका ८ का वडाअध्यक्ष तथा सिद्धबाबा मावि विद्यालय व्यवस्थापन समिति अध्यक्ष निरन्जन थापाले देउँसीभैलो खेलेर उठेको रकम फजुल खर्चमा सक्नेहरुलाई खुकुरी युवा क्लबले चुनौती दिएको बताउनु भयो । सामाजिक काम र त्यसको प्रतिष्ठा ठूलो कुरा भएकाले खुकुरी युवा क्लबले त्यसलाई सधैं पछ्याउँदै आएकोमा खुशी व्यक्त गर्नुभयो ।
