गुल्मी । गुल्मी जिल्लामा नसर्ने रोग नियन्त्रण र उपचार सुदृढीकरणका लागि ‘पेन प्लस क्लिनिक’ सम्बन्धी प्रवद्र्धनात्मक कार्यक्रम सुरु गरिएको छ । यस कार्यक्रमको उद्देश्य जिल्लाभरका स्वास्थ्यकर्मीहरूलाई उच्च रक्तचाप, मधुमेह, मुटुरोग, क्यान्सर लगायतका दीर्घकालीन रोगहरूको पहिचान, प्रारम्भिक उपचार तथा सन्दर्भ प्रणालीमा दक्ष बनाउनु हो ।
स्वास्थ्य कार्यालय गुल्मीको आयोजनामा र काठमाडौं इन्स्टिच्युट अफ चाइल्ड हेल्थको सहयोगमा सञ्चालन गरिएको सो कार्यक्रम ७ दिनसम्म चल्नेछ । यस अवधिमा गुल्मीका १२ स्थानीय तहअन्तर्गतका स्वास्थ्य संस्थामा कार्यरत करिब ५ सय स्वास्थ्यकर्मीहरूलाई रोगका कारण, लक्षण, जोखिम तत्व र नियन्त्रणका उपायबारे विस्तृत जानकारी दिइने स्वास्थ्य कार्यालय गुल्मीका निमित्त प्रमुख जनस्वास्थ्य निरीक्षक ताराबहादुर कार्कीले बताए ।
कार्यक्रमका क्रममा गुल्मी अस्पताल र काठमाडौं इन्स्टिच्युट अफ चाइल्ड हेल्थका चिकित्सकहरूले स्वास्थ्यकर्मीहरूलाई आवश्यक ज्ञान र सीप प्रदान गर्दै समुदायमै रोगको समयमै उपचार सम्भव बनाउने तयारी लिएका छन् । स्वास्थ्य कार्यालय गुल्मीका अनुसार, स्वास्थ्यकर्मीहरूको क्षमता अभिवृद्धिसँगै जिल्लामा नसर्ने रोगहरूको प्रारम्भिक पहिचान र उपचार प्रणाली सुदृढ हुने, जनस्वास्थ्यमा सुधार आउने र दीर्घकालीन रोगका कारण हुने मृत्यु तथा आर्थिक बोझ घट्ने अपेक्षा गरिएको छ ।
गुल्मी अस्पतालका निमित्त प्रमुख डा. विभव बस्यालका अनुसार, समुदायस्तरमा स्वास्थ्य शिक्षाको पहुँच विस्तार गर्दै नागरिकलाई रोगभन्दा पहिला सचेत गराउने हाम्रो मुख्य उद्देश्य रहेको बताए । पेन प्लस क्लिनिकले दीर्घ रोगीहरूलाई जिल्ला अस्पतालमै निरन्तर उपचार, परामर्श र औषधि सेवामा सहज पहुँच सुनिश्चित गर्नेछ ।
जिल्लामा नसर्ने रोग नियन्त्रण, जोखिम न्यूनीकरण र दीर्घकालीन स्वास्थ्य सेवामा दिगो सुधार ल्याउने अपेक्षा गरिएको काठमाडौं इन्स्टिच्युट अफ चाइल्ड हेल्थ डा. ध्रुव खत्रीले बताए । हाल नेपालमा तीव्र गतिमा वृद्धि हुँदै गएको नसर्ने रोगहरूको चुनौतीबारे चर्चा गर्दै, यस्ता रोगहरूको नियन्त्रणका लागि सबै तहमा सचेतना र समन्वय आवश्यक रहेको उनको जोड छ ।
अस्वस्थ आहार, शारीरिक निस्क्रियता, मदिरा र धूम्रपानको अत्यधिक सेवन तथा तनाव जस्ता व्यवहारगत जोखिमहरू नै आजको प्रमुख स्वास्थ्य समस्याका कारण बनेको खत्रीले बताए ।
अति गरिब र विपन्न नागरिकहरूका लागि ‘पेन प्लस क्लिनिक’ बाट सहयोग
गुल्मी अस्पतालमा नसर्ने रोगहरूको उपचारका लागि ‘पेन प्लस क्लिनिक’ सञ्चालनमा ल्याइएको छ । अस्पतालमा आउने गम्भीर तथा कडा नसर्ने रोगका बिरामीहरूका लागि सेवा उपलब्ध हुनेछ । दम, सुगर, प्रेसर, मुटु, स्तन क्यान्सर लगायतका बिरामीले सेवा पाउँदै आएका छन् ।
मुटुको भिडियो एक्सरे, डाइबिटिज, मुटुमा हुने प्वालहरू, मुटुको बाथरोग, बच्चाको हाइपरटेसन लगायतका बिरामीको लागि पनि पेन प्लस क्लिनिकले सहयोग पु¥याउदै आएको गुल्मी अस्पतालले जनाएको छ । अस्पतालमा पुग्ने बिरामीहरूले नसर्ने रोगको बारेमा जानकारी नहुँदा धेरै अन्योलमा पर्ने भएको हुँदा यो सेवाले बिरामीहरूलाई सहयोग पुग्ने छ ।
काठमाडौँ इन्स्टिच्युट अफ चाइल्ड हेल्थले अति गरिब र विपन्न नागरिकहरूका लागि निःशुल्क रूपमा स्वास्थ्य बिमा गर्नुका साथै बिमा रकम बाहेक अन्य ठुला रोगका बिरामीको शल्यक्रिया गर्नुपरेमा उनीहरूलाई निःशुल्क रूपमा सबै खर्च बेहोरेर उपचार गर्ने व्यवस्था गरिरहेको छ ।
गुल्मी अस्पतालका निमित्त प्रमुख डाक्टर विभव वस्यालका अनुसार अस्पतालमा नसर्ने रोगहरूका लागि छुट्टै कार्यकक्ष स्थापना गरेर सेवा प्रदान गरिदै आएको बताए । स्वास्थ्य तथा जनसङ्ख्या मन्त्रालयको नेतृत्वमा युनिसेफ नेपालको आर्थिक सहयोग तथा काठमाडौं इन्स्टिच्युट अफ चाइल्ड हेल्थको साझेदारीमा ‘पेन प्लस क्लिनिक’ सञ्चालनमा ल्याइएको हो । यो कार्यक्रम गुल्मी सहित ५ वटा जिल्लामा सञ्चालनमा रहेको छ ।
