गुल्मी। प्यूठानको गौमुखी गाउँपालिका–५ ठूलोबेशीमा बलेरो जीप दुर्घटना हुँदा एक जनाको मृत्यु भएको छ। हिजो (सोमबार) साँझ गुल्मीबाट बाग्दुलातर्फ आउँदै गरेको ०१–००१ च ३५०२ नम्बरको जीप अनियन्त्रित भई बाटोबाट करिब ३० मिटर तल खसेर दुर्घटना भएको जिल्ला प्रहरी कार्यालय प्युठानले जनाएको छ।
दुर्घटनामा मदाने गाउँपालिका–१ का लक्षण खत्रीका १२ वर्षीय छोरा सुजन खत्रीको घटनास्थलमै मृत्यु भएको प्रहरीले जनाएको छ। बालकको बुबा बिदेशबाट प्युठानको बाग्दुला आएकोले गाडी रिजर्भ गरी लिन जाने क्रममा गाडी दुर्घटना भएको थियो।
दुर्घटनापछी जीप चालक घटनास्थलबाट फरार छन्। अहिले सोही गाडीका चालक भनिएका एक व्यक्तिलाई नियन्त्रणमा लिइएको जिल्ला कार्यालय प्युठानका प्रहरी निरीक्षक हरि भट्टराईले जानकारी दिनुभयो।
