गुल्मीको प्रमुख उत्पादन
• तरकारी : साढे ३४ करोड मूल्यबराबरको १४ हजार पाँच सय मेट्रिकटन
• खसी–बोका : एक लाख २० हजारवटा खसी–बोका, चार सय १६ व्यावसायिक बाख्रा फार्म
• सुन्तला : ३२ करोड २७ लाख मूल्यको ६ हजार पाँच सय ७२ मेट्रिकटन उत्पादन, १२ करोड ८४ लाखको जिल्लाबाहिर बिक्री
• कफी : तीन करोड ४१ लाखबराबरको ३१ मेट्रिकटन उत्पादन, एक करोड २० लाखको जिल्लाबाहिर बिक्री
टोपलाल अर्याल,गुल्मी। गुल्मीमा व्यावसायिक पशुपालन फस्टाउँदै गएको छ । छोटो समयमै धेरै आम्दानी हुने भएकाले गोठदेखि व्यावसायिक फार्महरूमा बाख्रापालन गर्नेको संख्या वृद्धि भइरहेको भेटेरिनरी अस्पताल तथा पशुसेवा विज्ञ केन्द्र, गुल्मीले जनाएको छ । केन्द्रका अनुसार जिल्लामा खसी–बोका बिक्रीबाट किसानले वार्षिक दुई अर्ब ५५ करोड रुपैयाँभन्दा बढी आम्दानी गर्दै आएका छन् ।
विज्ञ केन्द्रका प्रमुख हुमकान्त पाण्डेयले वार्षिक ९८ करोड रुपैयाँबराबरका खसी–बोका जिल्लाबाहिर बिक्री हुने जानकारी दिए । रुरुक्षेत्र, सत्यवती, मदाने र धुर्कोट गाउँपालिकामा सबैभन्दा बढी बाख्रापालन हुने गरेको छ । करिब पाँच हजार बिउ बोकाहरू गुल्मीबाट अन्य जिल्लामा निर्यातसमेत हुँदै आएका छन् । सबै स्थानीय तहबाट संकलित तथ्यांकअनुसार जिल्लामा वार्षिक रूपमा एक लाख २० हजार खसी–बोका बिक्री हुँदै आएको केन्द्र प्रमुख पाण्डेयले बताए ।
अहिले जिल्लामा वार्षिक एक हजार एक सय ६३ मेट्रिकटन मासु उत्पादन हुने गर्छ । गुल्मीमा मासु धेरै उत्पादन हुने जमुनापारी क्रस र बोयर क्रस जातका बाख्रा उत्पादन गरिँदै आएको छ । गत आर्थिक वर्ष ०७९/८० मा केन्द्रमा चार सय १६ बाख्रा फार्म दर्ता भएका छन् । केन्द्रले बाख्रापालनका लागि किसान र कृषक समूहहरूलाई खोर निर्माण, बिउ, औषधि उपचार, खोप, मेसिनरी सामग्री खरिदलगायत क्षेत्रमा अनुदान उपलब्ध गराउँदै आएकोे पाण्डेयले बताए ।
१० महिनामा ९१ करोडको तरकारी उब्जनी
कृषि ज्ञानकेन्द्र, गुल्मीका अनुसार आर्थिक वर्ष ०८०/८१ को १० महिनामा ९१ करोड ७८ लाख ३२ हजार मूल्यबराबरको तरकारी उत्पादन भएको छ । त्यसमध्ये ४० करोड ६७ लाख १० हजारबराबरको कृषिउपज जिल्लाबाहिर बिक्री गरिएको छ ।
जिल्लामा तरकारी, सुन्तला, कफी, मह, किवी, मसिनो चामल, आलु, उखु, कोदो र अन्य रैथानी बाली गरेर ३१ हजार तीन सय ५७ मेट्रिकटन उत्पादन भएको कृषि ज्ञानकेन्द्र गुल्मीका वरिष्ठ कृषि विकास अधिकृत नवराज भण्डारीले जानकारी दिए ।
जिल्लामा सबैभन्दा बढी साढे ३४ करोड मूल्यबराबरको १४ हजार पाँच सय मेट्रिकटन तरकारी उत्पादन भएको केन्द्रको तथ्यांक छ । त्यसमध्ये १९ करोड ४३ लाखबराबरको तरकारी जिल्लाबाहिर बिक्री गरिएको छ । तरकारीका लागि छत्रकोट, सत्यवती र रुरुक्षेत्र गाउँपालिका उर्वर मानिन्छ ।
त्यस्तै, जिल्लाबाट १२ करोड ८४ लाखबराबरको सुन्तला अन्य जिल्लामा बिक्री गरिएको छ । यो वर्ष ३२ करोड २७ लाख मूल्यको ६ हजार पाँच सय ७२ मेट्रिकटन सुन्तला उत्पादन भएको कृषि ज्ञानकेन्द्र गुल्मीले जनाएको छ । सुन्तलाका लागि रेसुंगा, धुर्कोट र छत्रकोट अब्बल छन् । कफीको जननी गुल्मीबाट अहिले ३१ मेट्रिकटन अर्थात् तीन करोड ४१ लाख मूल्यबराबरको कफी उत्पादन भएको छ ।
एक करोड २० लाख मूल्यबराबरको कफी निर्यात भएको कृषि ज्ञानकेन्द्रले जनाएको छ । जिल्लाको रुरुक्षेत्र र छत्रकोट उखुको राम्रो सम्भावना भएका पालिका हुन् भने मालिकामा आलुको प्रचुर सम्भावना छ । जिल्लाबाट उखु पाँच सय ८९ र आलु आठ हजार एक सय मेट्रिकटन उत्पादन भएको छ । किवी र मह तथा कोदोलगायतका रैथाने बालीको पनि राम्रो सम्भावना रहेको छ । नयाँ पत्रीकाबाट साभार
